Isang video mula sa TikTok account na si @bradd.tonski ang kumakalat ngayon kung saan ipinapakita na pinapagalitan daw ng isang “Father Tandag” sina Vice President Leni Robredo at Senador Francis ‘Kiko’ Pangilinan, na kumakandidato bilang pangulo at pangalawang pangulo.
May kalakip na caption ang video na, “Sa wakas, may pari din pala na rumerespeto sa Diyos. Nasermonan sina Leni at Kiko. ‘Yan napala n’yo #LeniKiko. I salute you Father.”
Ang parehong kwento na laman ng video ay nilalaman din ng isang artikulo na isinulat ni Marlon Purificacion na inilathala ng Journal News noong Marso 13, kung saan idinagdag pa ni Purificacion na “kumakalat pa rin sa social media ang tsismis na napahiya si Robredo” sa naturang misa.
ANG SABI-SABI:
Pinagalitan ni “Father Tandag” si Leni Robredo at Kiko Pangilinan
ANG MARKA:
BINAGONG VIDEO
ANG KATOTOHANAN:
Ang video na inilabas sa Tiktok ay isang maikli at pinagdugtong-dugtong na mga bahagi ng homily ni Bishop Raul Dael ng Roman Catholic Diocese ng Tandag sa Surigao del Sur. Ang misa ay nangyari noong bumisita sina Robredo at Pangilinan sa siyudad noong Marso 8. Ang orihinal na video ng homily ay tumagal ng 13 minuto at ilang bahagi lamang ang pinili para magsilbi sa naratibo na pabor sa isang partikular na kandidato. Sa ilang bahagi ng video ay nagpakita ng litrato ni Ferdinand ‘Bongbong’ Marcos Jr., kahit na hindi naman patungkol sa kanya ang naturang homily.
Sa bandang 2:28 hanggang 2:33 timestamp din ng edited na video, ipinakitang sinasabi ni Bishop Dael na “If Bongbong will come here and ask for the mass, I will give it to him,” bago ito putilin. Sa orihinal na video ng homily, sa bandang 10:14 hanggang 10:25, maririnig na may karugtong pa ito na, “If Lacson will come, I will give it to him. The Church is always giving space and fairness to everyone.” Dala ng pagkakaputol ng video, pinagmukhang pabor sa kampo ni Marcos, Jr. ang mensahe ng obispo. Bago ang mensahe na ito, ipinahayag din ni Bishop Dael na wala siyang ineendorsong kandidato ngayong eleksyon.
Sa bandang dulo din ng misa ay ipinahayag ng obispo na mahalaga ang boto ng bawat isa at hindi dapat ito ibenta. Ika niya, “your vote is not only your right — your vote is also your power.”
BAKIT KAILANGAN I-FACTCHECK:
Kasalukuyang may higit sa 7.2 million views, 532,400 likes, 10,400 comments, at 25,800 shares ang naturang video sa Tiktok. Ang mismong user na si @bradd.tonski ay may higit sa 15,500 na followers sa TikTok at karamihan ng kanyang mga bidyo ay naglalaman ng iba’t ibang porma ng fake news.
Si Marlon Purificacion na nagsulat ng artikulo na may parehong sabi-sabing laman ng video ay mapapansing may nakapaglabas na rin ng mga artikulong napatunayang hindi totoo. Ang Journal News ay pagmamay-ari ni Leyte 1st District Representative Ferdinand Martin Romualdez, na pinsan ng katunggali sa eleksyon ni Robredo na si Marcos Jr. — Lyka Naranjo & Philip Mateo
Bahagi ang Altermidya Network ng #FactsFirstPH, na pinagsasama-sama ang iba’t ibang sektor na nakatuon sa pagtataguyod ng katotohanan sa pampublikong espasyo, at paghingi ng pananagutan sa mga nananakit dito sa pamamagitan ng kasinungalingan. Para sa mga interesadong sumali sa inisyatiba, mag-email sa info@factsfirst.ph.
Magbasa ng iba pang artikulo rito:
