Isang TikTok video mula sa user na si @norte_2k ang nagsasabing kinidnap daw ang pamilya Marcos matapos ang EDSA People Power noong 1986. Sa nasabing video, makikita ang pinagtagpi-tagping video mula sa ibang balita at dokumentaryo, kabilang na ang panayam kay Imelda Marcos mula sa dokumentaryong “The Kingmaker.” Ani Imelda, “It is not true that we fled from our country, we were kidnapped. They told us we were going to Paoay, a town in Ilocos, only to be brought to Hawaii.” (Hindi totoong umalis kami ng bansa. Ang sabi sa amin, pupunta kami sa Paoay, isang bayan sa Ilocos, pero dinala kami sa Hawaii.)
Kalakip ng video ang caption na, “Pina-kidnap ang pamilya Marcos, hindi nila iniwan ang Pinas! Andaming nauto ng mga Aquino.”
ANG SABI-SABI:
Kinidnap ang pamilya Marcos matapos ang EDSA People Power noong 1986
MARKA:
HINDI TOTOO
ANG KATOTOHANAN:
Noong Pebrero 25, 1986, matapos ang negosasyon kay Marcos Sr. na bumaba sa puwesto, ipinaalam ni US ambassador Stephen Bosworth kay dating Pangulong Cory Aquino na nakumbinsi si Marcos Sr. na umalis ng bansa sa pamamagitan ng pagtanggap nito sa alok ng mga Amerikano na umalis ng Malacañang. Gayunpaman, wala pang napag-usapang destinasyon para sa pamilya Marcos noonsa puntong iyon.
Sa kabila ng desisyon ni Marcos Sr. na “mamatay sa Palasyo,” nakiusap ang mga babaeng anak niya na lumulan na sila ng helicopter sa Clark at “umalis na patungong US.” Paliwanag nila, maaari kasing hindi na sila makalalabas nang buhay sa Malacañang kapag nanatili sila doon. Patunay itong hindi kinidnap ng mga Amerikano ang pamilya Marcos. Sa ulat ng Associated Press, hindi nagreklamo si Marcos Sr. nang dumating sila sa teritoryo ng US. Nang lumapag sila sa Hawaii noong Pebrero 26, nakipagpulong pa siya nang isang oras kasama ang state governor doon na si George Ariyoshi.
BAKIT KAILANGAN I-FACT CHECK:
Sa kasalukuyan, may humigit-kumulang 202,800 views, 788 comments, at 575 shares ang naturang video. Samantala, may 1,230 followers naman ang nag-post ng video sa TikTok. – Philip Mateo
Bahagi ang Altermidya Network ng #FactsFirstPH, na pinagsasama-sama ang iba’t ibang sektor na nakatuon sa pagtataguyod ng katotohanan sa pampublikong espasyo, at paghingi ng pananagutan sa mga nananakit dito sa pamamagitan ng kasinungalingan. Para sa mga interesadong sumali sa inisyatiba, mag-email sa info@factsfirst.ph.
Magbasa ng iba pang artikulo rito:
