Matapos i-anunsyo ng Department of Agrarian Reform (DAR) noong Pebrero 7 na sa loob ng 45 araw, mapapasakamay na ng mga magsasaka ng Hacienda Tinang sa Concepcion, Tarlac ang lupang kanilang sinasaka, inilahad ng mga grupong pesante na mistulang biglang pihit umano ang ahensya at ibinalik sa mga unang hakbang sa proseso ng pamamahagi ng lupa ang status ng higit 200 agrarian reform beneficiaries.
Kaya naman ngayong Lunes, sumugod ang mga magsasaka ng Tinang sa tanggapan ng DAR para singilin ang pangakong binitawan ni Agrarian Reform Sec. Conrado Estrella III.
