Salamat
Hanggang ngayon mahigpit ang pagtangan
sa kabila ng ligalig at kagipitan
Sa gitna ng unos na bumubuhos sa bayan.
Dama ko ang pagod mo
Na isigaw ang katotohanang pilit na binubura
Ng mga ganid na nagpapakalat ng katha
At ikaw na nagsusumikap ang ginawa pang agaw-eksena.
Kaya salamat
Sa pagod at hirap na hindi iniinda
Sa minsang pagkalimot ng sariling pangungulila
Gayunma’y hindi nawawala ang pagkalinga para sa iba.
Muli, salamat
Sa hindi pagpapadaig sa pananakot ng mga uhaw
At kahit tila hindi sigurado sa araw-araw
Maraming salamat sa hindi pagbitaw.
Agosto 2022
———————————————————————-
Si Frenchie Mae Cumpio ay 26-taong gulang na community journalist na ipinakulong sa Tacloban City noong February 7, 2020, kasama ang church worker na si Marielle Domequil, sa bisa ng mga gawa-gawang kasong illegal possession of firearms, illegal possession of explosives, at financing terrorism. Siya ay nagsilbing executive director ng alternative media outfit na Eastern Vista at anchor ng programang Lingganay han Kamatuoran (Kampana ng Katotohanan) na umere sa Aksyon Radyo Tacloban.
Napawalang-sala ang dalawa sa mga kasong illegal possession of firearms and explosives, nguntin hinatulang “guilty” sa financing terrorism. Nagpapatuloy ang laban para palayain siya at ibasura ang mga kaso laban sa Tacloban 5.
