ni Gabriela Baron
Pinoy Weekly

Sinuspinde ng National Telecommunications Commission (NTC) and operasyon ng Sonshine Media Network International (SMNI) dahil sa paglabag umano sa terms and conditions ng kanilang prangkisa.

Inanunsiyo nitong Dis. 21 ang suspensiyon na sakop ng Swara Sug Media Corporation na siyang nagpapatakbo sa SMNI.

Binigyan naman ng NTC ang network ng 15 araw upang ipaliwanag sa pamamagitan ng liham kung bakit hindi ito dapat patawan ng parusang administratibo.

Natanggap ng NTC noong Dis. 12 ang kopya ng resolusyon mula sa Kamara kung saan nakasaad ang tatlong paglabag umanong ginawa ng network kabilang na ang sadyang pagpapakalat ng maling impormasyon. Nakatakda naman ang administrative hearing hinggil dito sa Ene. 4, 2024.

Nauna namang pinatawan ng Movie and Television Review and Classification ng 14 araw na suspensiyon ang dalawang programa ng SMNI. Ang “Gikan ng Masa, Para sa Masa” kung saan host si dating Pangulong Rodrigo Duterte at “Laban Kasama ng Bayan” na pinangungunahan nina Lorraine Badoy-Partosa at Jeffrey Celiz.

Palalimin pa ang imbestigasyon

Ayon sa Bagong Alyansang Makabayan (Bayan), dapat lang umanong mapanagot ang SMNI sa pagpapakalat nito ng mga maling impormasyon.

“The Bagong Alyansang Makabayan welcomes the sanctions imposed by the MTRCB and NTC on [SMNI], considering the network’s glaring violations of accepted media standards and ethics and clear failure to fulfill its duties and obligations under its franchise,” pahayag ng grupo.

Tinawag din ng Bayan na hindi lehitimong media outlet ang SMNI kung hindi isang “propaganda platform” ni Apollo Quiboloy at ng kanyang “religious and political machinations.”

“Under the Duterte administration, it transformed into the main channel for red-tagging, terrorist labeling, disinformation, outright lies and defamation against government critics, activists, members of the press, the opposition, and virtually anyone critical of Duterte and his murderous fascist regime,” giit ng Bayan.

“It has become a purveyor of fascist ideology and a genuine threat to human rights,” dagdag nito.

Hinimok naman ng Bayan ang mga awtoridad imbestigahan pang mabuti ang mga kaduda-dudang ownership structure, financial statement, foreign dealings nito kabilang na sa state media ng China, at ang papel nito sa mga kriminal na aktibidad ni Quiboloy.

Matatandaang wanted sa kasong sex trafficking sa United States si Quiboloy.

Panagutin sa disimpormasyon

Samantala, sinabi naman ng Nation Union of Journalists of the Philippines (NUJP)  sa isang pahayag na dapat panaguntin ang SMNI sa pagpapakalat ng maling impormasyon at panre-red-tag nito.

“SMNI, its consultants, and its talents should be held accountable for peddling disinformation and hate speech, but should be accountable for those offenses and not for simply offending a member of the Congress,” saad ng pahayag.

“Even as SMNI and its supporters cry press freedom and freedom of expression now, may they also reflect on how they cheered on and abetted similar moves when these tactics were being used against journalists and newsrooms,” dagdag nito.

Sinabi rin ng NUJP na ang pagsususpinde ng NTC ay nagpapaalala ng pagtatangka ng nakaraang administrasyon na gamitin ang batas para busalan ang midya, katulad ng mga hakbang na ginamit nito sa ABS-CBN, Bulatlat, Pinoy Weekly, Rappler at Philippine Daily Inquirer.

“The Union’s issues with SMNI aside, this suspension by the National Telecommunications Commission is reminiscent of the previous administration’s attempts to weaponize the law and muzzle [the] media.”