FACT CHECK: Ekonomiya sa Pilipinas, “kusog nga nibangon” gikan sa krisis nga gidala sa COVID-19 pandemic

0
182

Nagmantala ang Philippine Daily Inquirer ug usa ka artikulo diin miingon si Economic Planning Secretary Karl Kendrick Chua niadtong Mayo 12 nga “kusog nga nibangon” ang ekonomiya sa nasud gikan sa mga epekto sa COVID-19 pandemic tungod kay ang gross domestic product (GDP) mitubo ug 8.3% sa unang quarter sa 2022.

Nihisgot pud ang artikulo nga mao kini ang ekonomiya nga mapanunod ni Presidente-elect Ferdinand Marcos Jr., tungod kay giangkon sa mga opisyal sa gobyerno nga ang Pilipinas ang “pinakapaspas nga pagtubo sa ekonomiya” sa rehiyon sa East Asia sa pagkakaron.

PAG-ANGKON

Ekonomiya sa Pilipinas, “kusog nga nibangon” gikan sa krisis nga gidala sa COVID-19 pandemic

EBALWASYON

DILI TINUOD

ANG KAMATUORAN

Ang independent think tank nga IBON Foundation nakamatikod nga dili maayo nga ibase lamang ang pag-ayo sa ekonomiya sa nasud sa 8.3% nga pagtubo sa GDP sa unang quarter sa tuig, tungod kay ang giingon nga pag-uswag tungod sa mga paggasto sa eleksyon. Kini nga pagtaas sa GDP wala gyud nagsuma sa usa ka nabag-o og malampuson nga ekonomiya. Ang panahon sa eleksyon miresulta sa mas taas nga paggasto sa transportasyon, akomodasyon ug serbisyo sa pagkaon, ug pag-imprenta sa mga materyales sa kampanya– diin nakita ang relatibong pagtubo.

Gipasiugda usab sa IBON nga ang nasud nag-antus sa ikaduha nga labing grabe nga pagkunhod sa ekonomiya sa mga rehiyon sa South, East, ug Southeast Asia kaniadtong 2020 tungod sa ‘mismanagement’ sa gobyerno sa COVID-19, nga nagresulta sa paghinay og pagkahuyang sa ekonomiya sa nasud. Kini nga kahuyang sa istruktura gidugangan sa pagtaas sa inflation rate og interest rate sa tibuok kalibutan.

Gipahulagway usab sa IBON Foundation ang ekonomikanhong pundasyon sa administrasyong Duterte isip “labing huyang,” ingon nga napamatud-an sa pagkunhod sa bahin sa agrikultura sa ekonomiya, bisan pa nga ang usa kin isa pinakadako na sektor sa Pilipinas. Ang pagkawad-an sa trabaho kusog usab nga misaka, uban ang gipahamtang sa gobyerno nga mga pag-lockdown bisan pa nga nagpagrabe sa kahimtang sa katawhan. Gipahayag sa grupo nga mabalik lang kini kung ang sunod nga administrasyon magtutok sa pagpalig-on sa domestic production, lokal nga industriya, ug paggasto sa gobyerno sa mga proyektong sosyal lakip na ang edukasyon, kahimsog, pabalay ug cash nga tabang, imbes nga unahon ang interes sa mga dagkong negosyo ug internasyonal o langyaw nga pamuhonan.

NGANONG IMPORTANTE KINI

Samtang ang 8.3% nga pagtubo sa ekonomiya sa nasud milabaw sa 6.8% nga prediksyon sa organisasyong pang market media nga Bloomberg, daghang mga tigpaniid ang nakamatikod nga kini na ang katapusan nga higayon nga makaingon ang Pilipinas nga adunay pag-uswag sa ekonomiya kung ang sukaranan nga mga isyu, lakip ang suporta alang sa agrikultura ug pagmugna og trabaho, wala gitubag. Maez Estrada ug Joseph Gloria

Ang Altermidya Network kabahin sa #FactsFirstPH nga naghiusa sa nagkalain-laing sektor nga nagpasalig sa pagpasiugda sa kamatuoran sa publikong luna, ug pagpangayo og tulubagon niadtong makadaot niini pinaagi sa pagpamakak. Alang sa mga interesado nga moapil sa inisyatiba, pag-email sa info@factsfirst.ph

Leave a reply

This site uses Akismet to reduce spam. Learn how your comment data is processed.