Noong Abril 16, ibinahagi ng SMNI ang isang Youtube video na pinamagatang ‘Atty. Gadon: Yung People Power Revolution, Fake yan.’ Ang video na ito ay bahagi ng panayam ng may-ari ng SMNI na si Apollo Quiboloy kasama ang senatorial aspirant at suspendidong abogado na si Lorenzo ‘Larry’ Gadon, kung saan iginiit ni Gadon na libreng pagkain at aliw lamang ang habol ng mga nagmartsa sa kalye noong 1986 EDSA People Power.
ANG SABI-SABI:
Libreng pagkain at aliw lang ang habol ng mga nagpunta sa EDSA People Power
MARKA:
HINDI TOTOO
ANG KATOTOHANAN:
Maiging nadokumento ang naging takbo ng 1986 EDSA People Power. Maraming saksi at kalahok sa makasaysayang pag-aalsang ito ang nakapagkwento kung gaano karami ang nagbahagi ng pagkain at tubig sa mga nagtipon sa EDSA. Walang mga beteranong kalahok sa EDSA People Power ang nagsabing pumunta lamang sila doon para sa pagkain at manood ng mga nagtatanghal na artista.
BAKIT KAILANGANG IFACT-CHECK:
Kahit na madalas siyang laman ng fact-check reports, patuloy na naglalabas ng maling impormasyon si Gadon kasama ang SMNI. May 1.01 milyon na subscribers ang SMNI sa YouTube. Sa kasalukuyan, ang panayam na ito ni Gadon ay umani na ng 104,799 views, 5,300 likes at 795 komento. – Vanessa Adolfo at Jamaica Marciano
Bahagi ang Altermidya Network ng #FactsFirstPH, na pinagsasama-sama ang iba’t ibang sektor na nakatuon sa pagtataguyod ng katotohanan sa pampublikong espasyo, at paghingi ng pananagutan sa mga nananakit dito sa pamamagitan ng kasinungalingan. Para sa mga interesadong sumali sa inisyatiba, mag-email sa info@factsfirst.ph.
Magbasa ng iba pang artikulo rito:
